សម្តេចតេជោ៖អ្នកឯងធ្វើអីខុស ទៅដេកព្រៃសជារឿងរបស់អ្នកឯង
02-May-2016 | ដោយ មែន កំសត់
ព្រះសីហនុ៖ ដោយទំនងចង់សំដៅលើ ចំណាត់ការរបស់អង្គភាពប្រឆាំងអំពើពុករលួយនិងតុលាការលើមន្ត្រីសង្គម ស៊ីវិលមួយចំនួនរួមទាំងមន្ត្រីអង្គការសហប្រជាជាតិម្នាក់ផង សម្តេចតេជោហ៊ុន សែន ក្នុងពិធីចូលរួមអបអរទិវាពលកម្មអន្តរជាតិ០១ឧសភាកាលពីព្រឹកម៉ិញនៅ ខេត្តព្រះសីហនុបានថ្លែងសារនយោបាយទាន់សភាពការណ៍មួយថាមិនមាន ការលើកលែងចំពោះមន្ត្រីសង្គមស៊ីវិលនិងមន្ត្រីអង្គការសហប្រជាជាតិ(UN) ដែលប្រព្រឹត្តខុស បើទោះជាមានអភ័យឯកសិទ្ធិក៏ដោយ ដោយសម្តេចថានឹងមិនមានការដោះដូរអ្វីនោះទេ។
សម្តេចតេជោបានមានប្រសាសន៍ដូច្នេះថា"អ្នកឯង បង្ករឿង រឿងទាំងឡាយអ្នកឯងកុំចោទរដ្ឋាភិបាល ប្រជាជនគេអត់ធ្វើអីគេសប្បាយ តែអ្នកឯងធ្វើអីខុស ទៅដេកព្រៃសវាជារឿងរបស់អ្នកឯងតើ ។ទាំងពួកគ្រឿងញៀន ទាំងពួកល្មើសច្បាប់ទាំងឡាយ ទៅដេកព្រៃស អាហ្នឹងសមមុខហើយ ...បើវាធ្វើខុសអាណាទៅជួយវាកើត។ហើយកុំនិយាយរឿងដោះដូរ អត់មានអីដោះដូរទេ ។ម្សិលមិញមានការប្រជុំប៉ុនប៉ងអោយមានការដោះដូរ...សូម្បីតែ នាយករដ្ឋមន្ត្រីក៏អំណាចមានព្រំដែនដែរ សូមអស់លោកNGOឬក៏ជាអ្នកធ្វើការនៅអង្គការសហប្រជាជាតិ កុំអាងអភ័យឯកសិទ្ធិហ្នឹងអោយសោះ ទោះបីម៉ែអភ័យឯកសិទ្ធិ ឪអភ័យឯកសិទ្ធិ តែដល់ម៉ោងគេដាក់ ក៏គេដាក់ កុំជោរ....អាហ្នឹងនិយាយអោយច្បាស់ អ្នកឯងសូកសាក្សី អ្នកឯងសង្កត់គេ ...មកចង់ដោះដូរអីណាអត់មានដោះដូរទេ..."។
ក្នុងពេល ជាមួយគ្នា សម្តេចតេជោ ហ៊ុន សែន បានប្រាប់កុំឲ្យបរទេសណាមួយលូកដៃចូលកិច្ចការផ្ទៃក្នុងរបស់ប្រទេស កម្ពុជាដោយត្រូវចេះគោរពឯករាជ្យភាពនិងអធិបតេយ្យរបស់កម្ពុជា ព្រោះថាកម្ពុជាមិនដែលលូកដៃកិច្ចការផ្ទៃក្នុងរបស់ប្រទេសណាមួយ នោះទេ។
សម្តេចតេជោក៏បានថ្លែងថានយោបាយនៅកម្ពុជាមិនមាន វិបត្តិដូចបក្សប្រឆាំងលើកឡើងនោះទេនិងថាបក្សប្រឆាំង៖"បោក ប្រជាពលរដ្ឋមិនគ្រប់គ្រាន់ទេ ទៅបោកព្រះមហាក្សត្រទៀត"។
សូមបញ្ជាក់ថាគណបក្សសង្គ្រោះជាតិបានចាត់ទុកស្ថានការណ៍នយោបាយនៅ កម្ពុជាកាន់តែធ្ងន់ធ្ងរទៅៗដោយ កាលពីថ្ងៃទី២៨ ខែមេសា តំណាងរាស្ត្រគណបក្សសង្គ្រោះជាតិ៥៣រូបក្នុងចំណោម៥៥រូប បានដាក់លិខិតមួយច្បាប់ថ្វាយព្រះមហាក្សត្រនរោត្តម សីហមុនីដោយបានទូលថ្វាយពីស្ថានការណ៍នយោបាយនៅកម្ពុជានិងស្នើសុំ ព្រះរាជអន្តរាគមន៍ឲ្យបន្ថយកម្តៅនយោបាយ៕
ចំនួនអ្នកទស្សនា
- ថ្ងៃនេះ471
- ម្សិលមិញ3811
- សប្តាហ៍នេះ14051
- ខែនេះ208651
- ឆ្នាំនេះ208651
- សរុប20651107